''Քրիստոնեաները միակ չեմ թողուր'' ըսաւ` Թրիբոլիի մէջ առաքելական փոխանորդ` գերապայծառ
Մարթիննելլին։
(Ռատիօ Վատիկան) Լիպիայի քաղաքական անկայուն իրավիճակը օրէ օր կը վատթարանայ.
ՏԱՀԵՇի ծայրայեղական խմբաւորումները գրաւած են արդեն երկրին մէկ մասը ու պայքար յայտարարած
են ''արեւմուտքի դէմ'' գլխատել տալով` 21 քրիստոնեայ եգիպտացի ղպտիներ։ Այս դժուար
կացութեան մէջ `Թրիբոլիի մէջ առաքելական փոխանորդ` Ֆրանչիսկեան միաբանութեան անդամ, գերապայծառ
Ճովաննի Իննոչէնցօ Մարթինելլին յայտնած է թէ` ինք, հակառակ բոլոր սպառնալիքներուն, կը
մնայ Լիպիայի մէջ, քրիստոնեաներու կողքին, որովհետեւ այս է իր առաքելութիւնը։ ''Մենք
հոս ենք յանուն Աստուծոյ եւ Սուրբ Ֆրանչիսկոսին, Յիսուսը վկայելու իղձով'' ըսած է Ան,
Ռատիովտականի հետ ունեցած հարցազրոյցի մը ընթացքին, պատրաստակամութիւն յայտնելով նաեւ
''վկայելու իր հաւատքը''։ Գերապայծառ Մարթինելլի կոչ ուղղած է միջազգային հասարկութեան
որ կարելին ընէ երկրի պետական իշխանութիւններուն հետ երկխօսութիւն հաստատելու համար,
մէկդի դնելով սեփական շահերը։ Անոնք – ըսած է առաքելական փոխանորդը – մոռցած են մարդկային
անկեղծ երկխօսութիւնը ու կը մտածեն միայն իրենց շահերուն։ Գերապայծառ Մարթինելլի
շեշտած է հարկաւորութիւնը մշակոյթներու միջեւ երկխօսութեան վերահաստատումին, քննադատելով
արեւմուտքի կողմէ` երկխօսութեան եւ ուրիշի հանդիպելու կամքի պակասութիւնը ու միայն սեփական
շահեր փնտռելու մտահոգութիւնը։ ''Յոյսս է որ այս ժողովուրդն ու երկիրը վերադառնան
իրենց առօրեայ սովորական կեանքին ուր կարելի ըլլայ մշակոյթներու միջեւ եղբայրական երկխօսութիւնը.
Գիտեմ դիւրին չէ. սակայն այս է միակ ճանապարհը''. հաստատած է Թրիբոլիի մէջ առաքելական
փոխանորդը` Ռատիովտիկանին հետ ունեցած զրոյցին ընթացքին ։